Алматы облысында жануарлардың жұқпалы ауруларымен күреске 5 млрд теңге бөлінді

Соңғы үш жылдың ішінде өңірде ветеринариялық инфрақұрылымды дамыту бағытында ауқымды жұмыстар атқарылды. Осы кезеңде 21 ветеринариялық пункт пен 19 мал қорымы пайдалануға берілді. Ал 2026–2027 жылдары тағы 94 ветеринариялық пункт пен 52 мал қорымын салуға жергілікті бюджеттен 4,1 миллиард теңге қарастырылған. Жоспар толық жүзеге асқан жағдайда облыстың ветеринариялық нысандарға деген қажеттілігі толық қамтамасыз етіледі.

Материалдық-техникалық базаны нығайту мақсатында ветеринариялық қызметке 100 қызметтік автокөлік сатып алынған. Сонымен қатар аса қауіпті 12 жұқпалы ауруға қарсы эпизоотиялық іс-шараларды жүргізуге 5 миллиард теңге бөлінген.

Бұдан бөлек, өңірде ветеринариялық-санитариялық қауіпсіздікті күшейту мақсатында бюджет қаражаты есебінен 123 миллион теңгеге 70 сібір жарасы көміндісі ветеринариялық-санитариялық талаптарға сәйкестендірілді.

Ветеринария қызметкерлерін кәсіби мерекесімен құттықтаған Алматы облысы әкімінің орынбасары Бақытнұр Бақытұлы сала мамандарының еңбегіне жоғары баға берді.

«Ветеринар маманы болу терең білім мен жоғары біліктілікті талап етеді. Қызығы мен қиындығы қатар жүретін осы абыройлы кәсіпті адал атқарып, халыққа қауіпсіз өнімнің жетуіне қосып жүрген үлестеріңіз үшін шынайы алғысымды білдіремін», – деді облыс әкімінің орынбасары.