Мемлекет басшысы наурыз айында өткен жалпыұлттық референдумға Қазақстан азаматтары белсенді қатысып, конституциялық реформаларды қолдағанын атап өтті.
«Бәріңізге белгілі, наурыз айында біз біртұтас қоғам болып жалпыұлттық референдумға қатыстық. Азаматтарымыз конституциялық реформаны қолдап, дауыс берді. Осылайша, біз жаңа Конституциямызды қабылдап, төл тарихымыздың жаңа парағын аштық», – деді Президент.
Қасым-Жомарт Тоқаевтың айтуынша, жаңартылған Ата заңда халықтың ғасырлар бойғы арман-мақсаты мен мемлекеттің негізгі құндылықтары көрініс тапқан.
Президент Конституцияда еліміздің аумақтық тұтастығы, мемлекеттік егемендігі, азаматтардың құқықтары мен бостандықтары басты құндылықтар ретінде айқындалғанын айтты.
Сонымен қатар заң мен тәртіпті сақтау, білім мен ғылымды дамыту, жаңа технологияларды енгізу, тазалық мәдениетін қалыптастыру, табиғатты қорғау және волонтерлік қызметті қолдау конституциялық міндеттер қатарына енгізілген.
«Түбегейлі жаңа сипатқа ие болған Ата заңымыз Әділетті Қазақстанның мызғымас жарғысына айналды. Конституцияда әр адам еліміздің мемлекеттік рәміздерін құрметтеуге тиіс деп көрсетілді. Себебі ұлттық нышандарымызды қадірлеу – отаншылдық рухының ең биік өлшемі», – деді Мемлекет басшысы.
Президенттің сөзінше, мемлекеттік рәміздерді құрметтеу әрбір азаматтың ел алдындағы жауапкершілігін және тәуелсіз Қазақстанға деген адалдығын білдіреді.
