Құжатқа сәйкес, жаңа өңірлік орталық Орталық Азия елдері мен Ауғанстанға экономикалық, әлеуметтік және экологиялық бағыттарда тұрақты дамуға қол жеткізуге қолдау көрсетеді.
Келісім аясында орталық кешенді іс-қимыл жоспарын әзірлеп, өңірлік жобалар мен бағдарламаларды іске асыратын болады. Сонымен қатар, БҰҰ құрылымдары, өңірлік ұйымдар, халықаралық қаржы институттары, жеке сектор және азаматтық қоғам арасындағы ынтымақтастықты күшейтуге ықпал етеді.
Құжат қорытындысында орталықтың теңізге шығу жолы жоқ дамушы елдерге арналған 2024–2034 жылдарға арналған іс-қимыл бағдарламасын іске асыруға да үлес қосатыны атап өтілген.
Сондай-ақ, орталық ұйымдастыратын іс-шараларға қатысатын БҰҰ-ға мүше мемлекеттердің өкілдеріне БҰҰ артықшылықтары мен иммунитеттері туралы конвенцияға сәйкес бірқатар жеңілдіктер қарастырылған.
Бұдан бөлек, Қазақстанның орталық және жергілікті атқарушы органдары орталық қызметкерлерінің жұбайларына жұмысқа рұқсат беру, визалар мен тұруға ықтиярхаттарды жедел рәсімдеу тәртібін қамтамасыз етеді.
Құжатта Үкімет пен БҰҰ арасында орталықтың қызметіне қатысты қосымша әкімшілік және қаржылық келісімдер жасау мүмкіндігі де қарастырылған.
Айта кетейік, Мәжіліс отырысында Қазақстан мен БҰҰ арасында аталған өңірлік орталыққа қатысты өзара түсіністік туралы меморандум да ратификацияланды.
