Аймақ басшысы жағажайлардағы қауіпсіздік пен қоғамдық тәртіп, сондай-ақ демалыс орындарының талаптарға сай болуы басты назарда болуы тиіс екенін атап өтті.
«Адам шығынының болмауын қатаң бақылауда ұстау керек. Көбіне адам өлімі рұқсат етілмеген аймақтарда болады. Сондықтан мұндай орындарды қадағалап, жер иелерімен де жүйелі жұмыс жүргізу қажет. Шомылуға рұқсат етілген аймақтар тексеріліп, қауіпсіздік белгілері мен ескерту тақтайшалары орнатылуы тиіс», – деді Марат Сұлтанғазиев.
Алматы облыстық Төтенше жағдайлар департаментінің мәліметінше, шомылу маусымына орай су айдындарының түбін тазалау, санитарлық жағдайды бақылау және инфрақұрылымды ретке келтіру жұмыстары кезең-кезеңімен жүргізілуде.
Тұрғындардың қауіпсіздігін қамтамасыз ету мақсатында жағажайларда бейнебақылау камералары орнатылады. Қазіргі таңда демалыс орындарының 80 пайызы шомылу маусымына дайын.
Сонымен қатар, жергілікті атқарушы органдар, облыстық прокуратура және Полиция департаменті бірлесіп, кешенді тексеру жұмыстарын жалғастырып жатыр.
