Іскерлік жиынды Сиань қаласындағы ҚР Бас консулдығы ұйымдастырған. Форум барысында Марат Сұлтанғазиев бастаған делегация мен қытайлық компаниялар 24 меморандумға қол қойды.
Келіссөздер нәтижесінде көлік-логистика, ауыл шаруашылығы, құрылыс, биотехнология және IT салаларын қамтитын жалпы құны 1 трлн теңгеден асатын жобалар пулы қалыптасты.
Аймақ басшысы Қазақстан Президенті Қасым-Жомарт Тоқаев елдің инвестиция мен әріптестікке ашық екенін бірнеше рет атап өткенін жеткізді.
«Қытай – біздің ең ірі сауда серіктесіміз әрі стратегиялық әріптесіміз. Алматы облысы Қытаймен тікелей шектеседі, бұл өзара сауда мен логистика үшін үлкен мүмкіндік береді», – деді Сұлтанғазиев.
Оның айтуынша, бүгінде өңірде жалпы құны 6,2 трлн теңгені құрайтын 216 инвестициялық жоба жүзеге асырылып жатыр. Соның ішінде 72 жоба шетелдік инвесторлардың қатысуымен іске асуда. Бұл бастамалар 80 мыңнан астам жаңа жұмыс орнын ашуға мүмкіндік береді.
Сондай-ақ өңірде PepsiCo және KT&G секілді ірі халықаралық компаниялар табысты жұмыс істеп келеді.
Соңғы үш жылда Алматы облысы мен Қытай арасындағы тауар айналымы 1 миллиард доллардан асқан. Қазіргі таңда өңірде қытай капиталының қатысуымен 140-тан астам кәсіпорын жұмыс істейді.
Форум барысында облыс әкімі жаңа Алатау қаласының құрылысына да тоқталды. Оның айтуынша, бұл жоба өңірдің инвестициялық тартымдылығын арттырып, заманауи инфрақұрылымы бар жаңа орталыққа айналады.
Марат Сұлтанғазиев шетелдік компанияларды бірлескен жобаларды жүзеге асыруға шақырып, инвестиция тек қаржы емес, сенім мен ұзақ мерзімді серіктестіктің көрсеткіші екенін атап өтті.
Алдағы уақытта Алматы облысы мен Қытай арасындағы ынтымақтастық одан әрі нығайып, жаңа ірі жобалар жүзеге асырылады деп күтілуде.
