Алматы облысы әкімінің баспасөз қызметінің мәліметінше, жергілікті уақыт бойынша сағат 20:30-дан 21:30-ға дейін өңірдегі 55 нысанның жарығы сөндіріледі. Олардың қатарында облыс әкімдігі, бірқатар аудан және қала әкімдіктерінің ғимараттары, сондай-ақ кәсіпорындар бар.
Жыл сайын ұйымдастырылатын бұл акция қоршаған ортаны қорғауға және табиғатқа ұқыпты қарауға үндейді. Биылғы тақырып елдегі экотуризмді дамытуға бағытталған.
Акция аясында тұрғындар бір сағатқа жарық пен тұрмыстық электр құралдарын өшіріп, табиғатқа деген жауапкершілігін көрсетуге шақырылады.
Айта кетейік, «Жер сағаты» акциясына әлем бойынша 2 миллиардтан астам адам қатысады. Игі шараға 180 елден 7 мыңға жуық қала қосылады. Биыл акция әлемде 19-шы рет, ал Қазақстанда 17-ші рет өткізілмек.
Шараның негізгі мақсаты – планетаның табиғаты мен ресурстарына жауапкершілікпен қарау қажеттілігіне қоғам назарын аудару.
