Ведомствоның ресми мәліметінше, бұған дейін баруға кеңес берілмеген елдер тізімінен Мысыр Араб Республикасы шығарылды. Мұндай шешім қазіргі жағдайды жан-жақты саралау нәтижесінде қабылданған.
Атап айтқанда, елдегі азаматтық инфрақұрылымның тұрақты жұмыс істеуі, халықаралық әуежайлардың қалыпты режимде қызмет көрсетуі және негізгі туристік аймақтардағы қауіпсіздік деңгейінің сақталуы ескерілген.
Сонымен қатар, министрлік Таяу Шығыстағы жалпы жағдайдың әлі де күрделі екенін атап өтті. Осыған байланысты өңірдегі бірқатар елдердің әуе кеңістігінің уақытша жабылуына орай, толық тұрақтану кезеңіне дейін келесі мемлекеттерге сапардан бас тарту жөніндегі ұсыным күшінде қалады:
Бахрейн, Израиль, Йемен, Иордания, Ирак, Иран, Қатар, Сауд Арабиясы Корольдігі, Кувейт, Ливан, Біріккен Араб Әмірліктері, Оман және Сирия.
Сыртқы істер министрлігі аталған елдердің аумағында жүрген Қазақстан азаматтарына жеке қауіпсіздік шараларын күшейтуді және қауіпті болуы мүмкін аймақтарға бармауды ұсынды.
Сондай-ақ, ведомство жергілікті билік органдарының талаптарын қатаң сақтаудың маңыздылығына назар аударды. Әсіресе зымырандық қауіп туындаған жағдайда дереу паналау орындарына бару қажеттігі ескертілді.
Бұдан бөлек, азаматтарға шұғыл көмек алу үшін Қазақстанның шетелдегі мекемелерімен, туроператорлармен және әуе тасымалдаушыларымен тұрақты байланыста болу ұсынылды.
