Полиция қызметкерлері ұшқышсыз ұшу аппараттарын пайдалану арқылы жолдағы жағдайды әуеден бақылауды күшейтіп, қауіпті маневрлерді дер кезінде тіркеуде.
Алматы облысы полиция департаментінің бастығы Мейрам Әбікеевтің айтуынша, өткен демалыс күндері өңірдің негізгі автожолдарында полиция қызметкерлері күшейтілген режимде жұмыс істеген.
«Ерекше назар дрондарды қолдануға аударылды. Бұл құрылғылар жол қозғалысын әуеден тиімді бақылауға және жүргізушілердің қауіпті әрекеттерін жедел анықтауға мүмкіндік береді. Қабылданған шаралардың нәтижесінде 500-ге жуық құқық бұзушылықтың жолы кесілді», – деді ол.
Талдау нәтижесі көрсеткендей, жол-көлік оқиғаларының негізгі себептері ретінде қарсы бағыттағы жолаққа шығу және белгіленген жылдамдықты асыру фактілері жиі тіркеледі.
Полиция өкілдері мұндай шаралардың басты мақсаты жүргізушілерді жазалау емес, жол-көлік оқиғаларының алдын алу және барлық жол қозғалысы қатысушыларының қауіпсіздігін қамтамасыз ету екенін атап өтті.
Айта кетейік, бұл бағыттағы жұмыстар алдағы уақытта да «Заң және тәртіп» қағидаты аясында жалғасады.
