Мәліметке сәйкес, 2026 жылдың қаңтар айында облыста 100-ден астам қызылша жағдайы тіркелген. Ал ақпан айында шамамен 200 жағдай анықталған. Осылайша, жыл басынан бері өңірде 300-ге жуық адам инфекция жұқтырған.
Ауруға шалдыққандардың 77 пайызы – 5 жасқа дейінгі балалар. Мамандар науқастардың 85 пайызы вакцина алмағанын айтады. Оның ішінде 38 пайызы ата-анасының екпеден бас тартуына байланысты егілмеген болса, 30 пайызы екпе жасына әлі жетпеген балалар.
Қызылшаның әрі қарай таралуының алдын алу мақсатында Қазақстан Республикасының Бас мемлекеттік санитариялық дәрігерінің арнайы қаулысы қабылданды. Құжатқа сәйкес, бірқатар шұғыл профилактикалық шаралар жүзеге асырылып жатыр.
Атап айтқанда:
6–11 ай аралығындағы балаларға қосымша вакцинация жүргізу;
екпе күнтізбесіне сәйкес егілмеген 2–5 жас және 7–18 жас аралығындағы балаларды иммундау;
екпесі жоқ немесе ол туралы мәліметі жоқ 30 жасқа дейінгі медицина қызметкерлерін вакцинациялау.
Облыста 6–11 айлық 6 мыңнан астам бала екпе алды. Сонымен қатар, қосымша иммундау аясында шамамен 1 мың бала және 336 медицина қызметкері вакцинацияланған.
Балаларды жоспарлы түрде стационарға жатқызу талаптары да қатаңдатылды. Енді жоспарлы госпитализация қызылша, қызамық және эпидемиялық паротитке қарсы вакцинация жүргізілгеніне кемінде 21 күн өткен жағдайда ғана жүзеге асырылады. Медициналық қарсы көрсетілімі бар балалар бұл талаптан босатылады.
Ұжымдық иммунитетті қалыптастыру мақсатында мектепке дейінгі ұйымдарда және мектептерде бірқатар талап енгізілген. Атап айтқанда, топтағы балалардың кемінде 90 пайызы екпемен қамтылуы тиіс. Жедел респираторлық ауру немесе қызылша белгілері бар балалар мен қызметкерлерді оқу орнына кіргізбеу үшін «таңғы сүзгі» жүргізіледі.
Қызылша жағдайы тіркелген кезде екпе алмаған балалар уақытша оқу процесінен шеттетіледі. Бұл ұйымдасқан ұжымдардағы инфекция таралуын төмендетуге бағытталған.
