Аудан басшысы жаңа қоныс иелерін қуанышымен құттықтап, тұрғындарды баспанамен қамту жұмыстары алдағы уақытта да жүйелі түрде жалғасатынын атап өтті.
Соңғы екі жыл ішінде мемлекеттік тұрғын үй қорынан баспанаға мұқтаж ретінде кезекте тұрған 161 отбасы жаңа пәтерге қол жеткізіп, қоныс тойын атап өткен. Бұл бағыттағы жұмыстар биыл да өз жалғасын тауып отыр.
Бұл жолы «Қарлығаш» және «Елтай» тұрғын үй кешендерінен 26 отбасы жаңа баспанаға ие болды. Пәтер кілтін алған сәттегі тұрғындардың шаттыққа толы жүздері, балалардың қуанышты күлкісі – өңірдегі әлеуметтік қолдаудың нақты нәтижесі.
Аудан әкімдігінің мәліметінше, алдағы кезеңде Отбасы банк тексеруінен өткеннен кейін қосымша 260 пәтер тұрғындарға кезең-кезеңімен табысталмақ. Бұл — Қарасай ауданында халықты баспанамен қамту бағытындағы жұмыстардың жүйелі жүзеге асып жатқанын көрсетеді.
Тұрғындарды тұрғын үймен қамтамасыз ету — халықтың әл-ауқатын арттыруға бағытталған мемлекеттік саясаттың басым бағыттарының бірі. Аудан басшылығы бұл жұмыстардың алдағы уақытта да жалғасатынын жеткізді.
Жаңа қоныс иелеріне береке мен шаттық тілейміз. Қоныс тойларыңыз құтты болсын!
