2026 жылдың басында №1 перзентханада қайта жаңғырту жұмыстары басталды. Жобаның аясында Бөгенбай батыр көшесіндегі 1938 жылдан бері жұмыс істеп келе жатқан ескі ғимарат бұзылды. Қазіргі уақытта ол ҚР СП 2.03-30-2017 «Сейсмикалық аймақтардағы құрылыс» стандарттарына сәйкес келмейді, өйткені ғимарат сейсмикалық жарық сызығында орналасқан.
Ғимараттың техникалық жағдайы бойынша сараптама қорытындысына сәйкес, анықталған сәйкессіздіктерді жою үшін толықтай құрылысқа тең қаржы қажет болар еді. Қолданыстағы іргетасты күшейту мүмкін емес деп бағаланды. Ал күрделі жөндеу мен конструкциялық нығайту экономикалық тұрғыдан тиімсіз. Техникалық тексеру қорытындысында ескі ғимаратты бұзу ұсынылды.
Конструкциялық тозуынан бөлек, объект қазіргі медициналық стандарттарға сай келмейді. Мысалы, ғимаратқа өрт сөндіру техникасының жетуі мүмкін емес, қабылдау бөлімінде шұғыл операциялық бөлме жоқ, науқастарды triage-сұрыптау мүмкіндігі қамтамасыз етілмеген, желдету жүйесі жоқ, ота блогы мен жан сақтау бөлімінде инфекциялық бақылауға арналған арнайы бөлмелер қарастырылмаған. Науқастар мен персонал ағымын бөлу қағидалары сақталмайды, жүк және жолаушы лифттері жоқ, инженерлік желілер тозған, науқастар жеке дәретханасы бар жайлы палаталардың жоқтығы бойынша бірнеше рет шағымданған.
2025 жылы Мемлекеттік ведомстволық сараптамадан оң қорытынды алынған.
Қазіргі уақытта ескі ғимарат (3 347,9 м²) бұзылуда. Оның орнына 10 мың шаршы метрден асатын (10 381,645 м²) үш қабатты заманауи медициналық кешен салу жоспарлануда. Цоколь және техникалық қабаттары бар корпус босану мекемелері үшін халықаралық стандарттарға сәйкес жобаланған.
Жаңа перзентхана 155 орынға есептелген. Заманауи палаталар аналар мен нәрестелер үшін қолайлы жағдай туғызады, ал энергиялық жағынан тиімді технологияларды қолдану эксплуатациялық шығындарды азайтуға мүмкіндік береді.
Қабылдау бөлімінде шұғыл операциялық бөлме қарастырылған, бұл жедел көмек көрсетуге кідіріссіз мүмкіндік береді. Жалпы операциялық бөлмелер саны екіден төртке көбейеді, бұл медициналық қызметтің қолжетімділігі мен сапасын айтарлықтай арттырады. Қабылдау бөлімі күнделікті қабылдай алатын науқастар саны 25-тен 38-ге дейін ұлғаяды, бұл мегаполис тұрғындарының санының өсуіне сәйкес келеді.
Жаңа корпус пайдалануға берілгеннен кейін көрсетілетін медициналық қызметтер саны жылына 11 мыңнан 14 мыңға дейін, ал босанулар саны 5 мыңнан 9 мыңға дейін артады деп жоспарлануда. Құрылыс барысында перинаталдық орталық жұмысын жалғастырады. Барлық бөлімшелер уақытша Сейфуллин даңғылы бойындағы «А» блогына орналастырылады.
«№1 перзентхананың тарихи дәстүрлерін сақтау ерекше назарда. Ұжым халықаралық клиникалық талаптарға сәйкес заманауи және қауіпсіз жағдайда жұмысын жалғастырады. Жаңа ғимарат акушерлік, перинаталдық көмек және жаңа туған нәрестелерге күтім саласында инновациялық технологияларды, озық медициналық тәсілдерді және дәлелді тәжірибелерді енгізуге мүмкіндік береді. Мекеменің тарихы мен қазіргі медициналық стандарттарды үйлестіре отырып, оның әлеуеті күшейеді», – деп атап өтті Алматы қаласының қоғамдық денсаулық сақтау басқармасы.
№1 перзентханасын жаңғырту медициналық көмектің сапасы мен қолжетімділігін арттыруға, сондай-ақ Алматы қаласының науқастары мен персоналы үшін қауіпсіз және жайлы жағдай жасауға бағытталған.
