Жоба шеңберінде өңірдегі 10 мектеп пен 3 колледжде құқық қорғау органдарында қызмет еткен тәжірибелі мамандардың қатысуымен шамамен 9 мыңға жуық сабақ өткізілген. Сонымен қатар 400-ге жуық оқушымен жеке профилактикалық жұмыс ұйымдастырылды. Бұл жұмыстар буллингтің, зорлық-зомбылықтың және түрлі құқықбұзушылықтардың алдын алуға бағытталған.
Мамандардың айтуынша, оқыту барысында нақты өмірлік жағдайларды талдауға басымдық берілген. Мұндай формат оқушылар мен педагогтердің белсенділігін арттырып, оқу процесінің тиімділігін күшейткен. Қылмыстық және әкімшілік жауапкершілік мәселелері бойынша жүргізілген анонимді тестілеу нәтижесінде қатысушылардың 90 пайыздан астамы материалды жоғары деңгейде меңгергені анықталған.
Оқу жылының I және II тоқсандарының қорытындысы бойынша құқықбұзушылықтардың азаюы бойынша тұрақты оң динамика тіркелді. Қылмыстық құқықбұзушылықтар саны алты есе қысқарса, әкімшілік құқықбұзушылықтар 29,5 пайызға азайған. Сондай-ақ ішкі істер органдарында есепте тұрған оқушылар саны алты есе қысқарып, мектепішілік есептегі балалар саны 30 пайызға төмендеген.
Оқу-ағарту саласындағы уәкілетті орган өкілдерінің мәліметінше, 2026 жылдың қыркүйек айынан бастап балалар құқықтарының бұзылу көрсеткіші жоғары білім беру ұйымдарында жобаны кеңінен енгізу жоспарланып отыр. Қазіргі уақытта жобаны республикалық деңгейде енгізу үшін кешенді талдау жүргізіліп, білім беру ұйымдарының тізімі қалыптастырылуда.
Айта кетейік, пилоттық жоба аясындағы сабақтар екі аптада бір рет өткізіледі. Әдістеме оқушылардың құқықтық білім деңгейін анықтауға арналған бастапқы және қорытынды диагностиканы, сондай-ақ жастар ортасындағы тәуекелдерді ерте анықтау мақсатында тұрақты мониторинг жүргізуді қамтиды.
