Сапардың негізгі мақсаты – кәсіпорынның өндірістік әлеуетін бағалау және тау-кен металлургиясы саласындағы озық тәжірибемен танысу.
Eti Bakır A.Ş. – Cengiz Holding құрамына кіретін Түркияның жетекші металлургиялық компанияларының бірі. Компания мыс шикізатын барлау мен өндіруден бастап, оны байыту және дайын металл күйінде шығаруға дейінгі толық өндірістік циклді жүзеге асырады. Өндіріс нысандары Түркияның бірнеше өңірінде орналасқан, ал өнімдері ішкі нарықпен қатар экспортқа да шығарылады.
Зауытты аралау барысында өндірісті өзара сабақтастыра ұйымдастыру және энергиямен қамтамасыз ету мәселелеріне ерекше назар аударылды. Кәсіпорынның жеке энергетикалық қуат көздеріне сүйенуі өндірістік шығындарды азайтып, өндіріс көлемі артқан жағдайда да жұмыс тұрақтылығын сақтауға мүмкіндік беретіні атап өтілді.
Компанияның тәжірибесі Алматы облысының өнеркәсіптік әлеуетін арттыру, заманауи технологияларды енгізу, шикізатты терең өңдеу және экспорттық мүмкіндіктерді кеңейту бағыттарында маңызды үлгі ретінде қарастырылуда. Делегация өкілдерінің айтуынша, мұндай жұмыс сапарлары іскерлік байланыстарды нығайтып, өңірдің халықаралық әріптестігін дамытуға жол ашады.
