Сапардың негізгі мақсаты – ауыл шаруашылығы саласындағы екіжақты ынтымақтастықты кеңейту, заманауи агротехнологиялар бойынша тәжірибе алмасу, сондай-ақ ғылыми-зерттеу және инвестициялық бағыттағы әріптестікті дамыту.
Делегация құрамына агроөнеркәсіптік кешенді мемлекеттік басқару, технологиялар трансферті және инвестициялар саласында шешім қабылдайтын негізгі өкілдер енді.
Жұмыс сапары аясында қытайлық инвесторлар «Қазақ жеміс және көкөніс шаруашылығы ғылыми-зерттеу институты «Қайнар» ЖШС-нің өңірлік филиалына барды. Қонақтарды мекеменің ғылыми әлеуеті, селекциялық бағдарламалары және өндірісте заманауи технологияларды енгізуге бағытталған тәжірибелік базасы ерекше қызықтырды.
Сапар нәтижелері Алматы облысының ауыл шаруашылығы саласы шикізаттық өндіріс шеңберінен шығып, жоғары қосылған құны бар, ғылыми негізделген аграрлық кластер қалыптастыруға бет алғанын көрсетті.
Келіссөздер барысында мемлекеттік органдар өкілдерімен бірлескен ғылыми-зерттеу жобаларын іске асыру, тұқым шаруашылығы, сондай-ақ ауыл шаруашылығы өнімдерін өндіру және өңдеу мәселелері талқыланды. Тараптар ынтымақтастықты тереңдетуге және нақты инвестициялық бастамалар бойынша диалогты жалғастыруға өзара дайын екенін білдірді.
