Министрдің айтуынша, қаңтар–қараша айларының қорытындысы бойынша ел экономикасының өсімі 6,4 пайызды құраған. Нақты сектордағы өсім 8,3 пайызға жетіп, қызмет көрсету саласындағы көрсеткіштен (5,3 пайыз) жоғары болды.
«Экономикалық өсімнің негізгі драйверлері – көлік, құрылыс және тау-кен өнеркәсібі. Сауда көлемі 8,8 пайызға, ауыл шаруашылығы 6,1 пайызға, ал өңдеу өнеркәсібі 5,9 пайызға өсті», – деді Серік Жұманғарин.
Оның айтуынша, экономикалық өсімге инвестициялар да айтарлықтай әсер еткен. Негізгі капиталға салынған инвестициялар 13,3 пайызға артып, 18,5 трлн теңгені құраған. Оның ішінде жеке инвестициялар 9,8 пайызға өскен.
Инвестициялардың ең жоғары өсімі болашақта сапалы экономикалық өсімді қамтамасыз ететін салаларда тіркелген. Атап айтқанда, қаржы қызметі саласында инвестициялар 82,8 пайызға, электр энергиясымен, газбен, бумен және ыстық сумен қамтамасыз ету саласында 57,9 пайызға, білім беру саласында 31,6 пайызға, ақпарат және байланыс саласында 24,5 пайызға, ауыл шаруашылығында 24,1 пайызға, өңдеу өнеркәсібінде 20,7 пайызға, көлік саласында 13,3 пайызға артты.
Өңдеу өнеркәсібіндегі өндіріс көлемі 5,9 пайызға өскен. Бұл көрсеткіш, негізінен, машина жасау саласындағы өндірістің 11,6 пайызға артуы есебінен қамтамасыз етілген. Оның ішінде автомобиль жасау 15,2 пайызға, электр жабдықтарын өндіру 16,7 пайызға өскен. Сонымен қатар азық-түлік өнімдерін өндіру 8,7 пайызға, сусындар өндірісі 9,2 пайызға, химия өнеркәсібі 8,1 пайызға, мұнай өңдеу саласы 6,5 пайызға, металл бұйымдарын өндіру 12,8 пайызға, құрылыс материалдарын шығару 7,1 пайызға артқан.
Тау-кен өнеркәсібінде де жоғары өсім сақталған – 9,7 пайыз. Бұл мұнай өндіру көлемінің 14,1 пайызға, табиғи газ өндірудің 16,7 пайызға және көмір өндірудің 9,7 пайызға артуымен байланысты. Ал металл кендерін өндіру 0,6 пайызға қысқарған. Құрылыс саласында өсім қарқынының баяулауы байқалған.
Ауыл шаруашылығындағы өсім, министрдің айтуынша, негізінен өсімдік шаруашылығы көлемінің 7,6 пайызға артуы есебінен қамтамасыз етілген.
«Бұл қолайлы ауа райы жағдайларымен және дәнді әрі майлы дақылдардың жоғары өнімділігімен байланысты. Екінші жыл қатарынан дәнді дақылдардан рекордтық өнім алынып, шамамен 27 млн тонна жиналды. Сондай-ақ бұршақ дақылдарынан 1 млн тонна, майлы дақыл тұқымдарынан 4,7 млн тонна көлемінде рекордтық өнім алынды. Мақта жинау бойынша да жоғары көрсеткіштер күтілуде», – деп түйіндеді Серік Жұманғарин.
