Табиғат аясындағы тыныштық пен белсенді демалыс
Тау бөктерінде таза ауа жұтып, табиғатпен оңаша қалғысы келетіндер үшін Oi-Qaragai тау-курорты – ең танымал бағыттардың бірі. Теңіз деңгейінен 2140 метр биіктікте орналасқан кешен қыста тау шаңғысы мен сноубордты, ал жылы мезгілде жаяу серуен мен экотуризмді ұсынады. Курорт аумағында қонақүйлер, SPA-аймақтар мен отбасылық демалысқа арналған инфрақұрылым бар.
Сондай-ақ табиғаттың шынайы сұлулығын сезінгісі келетіндер Көлсай мен Қайыңды көлдеріне, Шарын шатқалына немесе Алтын-Емел ұлттық паркіне жол тарта алады. Бұл бағыттар фотоға түсуді, жаяу туризмді және тыныш демалысты ұнататындар үшін ерекше әсер сыйлайды.
Отбасылық демалыс пен ойын-сауық
Балалармен бірге демалуды жоспарлаған жандар үшін Қонаев қаласындағы ASP CLUB кешені қолайлы. Мұнда түрлі ойын-сауық алаңдары, спорттық аймақтар мен маусымдық іс-шаралар ұйымдастырылады. Қыста бұл аумақта ашық аспан астындағы мұз айдыны жұмыс істеп, демалысты белсенді әрі көңілді өткізуге мүмкіндік береді.
Сауықтыру және релакс
Денсаулығын нығайтуды көздегендер үшін Ұйғыр ауданындағы Шонжының ыстық қайнар көздері – таптырмас орын. Термалдық бассейндердегі судың температурасы +50 градусқа дейін жетіп, бұл аймақты жыл бойы сұранысқа ие сауықтыру орталығына айналдырған. Мұнда келушілер буын ауруларына, жүйке жүйесіне және жалпы ағзаға пайдалы процедуралар қабылдай алады.
Гастрономиялық туризм
Алматы облысында демалысты ұлттық әрі еуропалық ас мәзірімен ұштастыруға болады. «Талғар форелі» мейрамхана кешенінде табиғат аясында балық аулап, жаңа піскен тағамдардан дәм тату мүмкіндігі бар. Ал «ZЕРНО – Первомайские пруды» кешені тыныштық пен жайлы атмосфераны қалайтын отбасылар мен жұптарға арналған.
Этнотуризм мен ұлттық мәдениет
Қазақтың салт-дәстүрі мен ұлттық мәдениетін жақыннан тануға ниетті жандар үшін Қарасай ауданындағы NOMAD этноорталығы мен Талғар ауданындағы NOMAD ARENA ат-спорт кешені ашық. Мұнда ұлттық тағамдар ұсынылып, ат спорты көрсетілімдері мен этномәдени бағдарламалар ұйымдастырылады.
Қысқа сапарға да, толық демалысқа да қолайлы өңір
Мамандардың айтуынша, Алматы облысындағы туристік бағыттардың әртараптануы өңірді демалыс күндері қысқа сапарлар үшін де, бірнеше күндік толыққанды демалыс үшін де тартымды етіп отыр. Туристерге сапарды алдын ала жоспарлап, ауа райы мен жол жағдайын ескеруге кеңес беріледі.
