Жоба аясында жоспарланған 36 мың шаршы метрдің алғашқы 10 мың шаршы метрі пайдалануға беріліп, бүгінде толыққанды жұмыс істеп тұр. Алғашқы резиденттер қойма алаңдарын белсенді қолданып, барлық логистикалық процестер тұрақты режимде жүзеге асырылуда. Жоба алғашқы кезеңнің өзінде экономикалық тиімділігін көрсетіп отыр, ал екінші және үшінші кезектерді іске асыру алдағы уақытқа жоспарланған.
DSF Trading Co ЖШС-нің бас директоры Нурмат Сөркеловтің айтуынша, кешеннің бірінші кезеңінің толық жүктемемен жұмыс істеуі өңірде заманауи логистикалық инфрақұрылымға деген жоғары сұранысты айқын көрсетеді.
«А санатты қоймаларға деген қажеттілік жылдан-жылға артып келеді. Клиенттерімізге жүктерді сақтаудың және өңдеудің заманауи талаптарға сай жағдайлары ұсынылып отыр. Бұл – өңірдегі сауда мен e-commerce бағытының дамуына қосымша серпін. Алматы облысының әкімдігіне, соның ішінде инженерлік инфрақұрылымды жеткізу мәселелерін шешуде көрсеткен қолдауы үшін ерекше алғыс білдіреміз», – деді ол.
Алматы облысының өңірлік дамыту орталығының директоры Ақжол Исақов логистика секторын дамыту өңірдің экономикалық саясатындағы басым бағыттардың бірі екенін атап өтті.
«Бұл жоба Алматы облысында заманауи логистикалық инфрақұрылымның жоғары сұранысқа ие екенін дәлелдейді. Бірінші кезеңнің іске қосылуы – нарық үшін маңызды сигнал. Мұндай бастамалар сауда, өндіріс және экспорттық операциялардың дамуына берік негіз қалыптастырып, өңірдің ірі логистикалық торап ретіндегі рөлін күшейтеді», – деді ол.
Жобаның келесі кезеңдерін іске асыру қойма кешенінің қуатын едәуір арттырып, өңірге жаңа резиденттер мен ірі логистикалық операторларды тартуға мүмкіндік береді. Мамандардың айтуынша, бұл бастама қосымша жұмыс орындарын ашуға, ішкі және сыртқы сауданы дамытуға, сондай-ақ Алматы облысының елдегі жетекші логистикалық орталық ретіндегі позициясын нығайтуға ықпал етпек.
