Жедел-іздестіру іс-шараларының нәтижесінде облыстық киберқылмысқа қарсы күрес басқармасының қызметкерлері Алматы қаласы мен Алматы облысы аумағында әрекет еткен қылмыстық топтың күдікті ұйымдастырушысы мен оның үш сыбайласын ұстады.
Полиция мәліметінше, қылмыстық схеманың ұйымдастырушысы небәрі 19 жаста, ол Алматы облысының тұрғыны. Тергеу деректеріне сәйкес, күдікті қылмыстық әрекетке 2023 жылдың қазан айынан бастап тартылған. Алғашында қарапайым дроп ретінде жұмыс істеп, 2024 жылдың маусымынан бастап басқа дропперлердің әрекетін үйлестірген. Ал 2025 жылдың қаңтарынан бастап куратор рөлін атқарып, үш дропперді басқарған.
Ұрланған қаражатты қолма-қол ақшаға айналдыру үшін қаскөйлер 50-ден астам жалған тұлғаның атына рәсімделген банк қосымшалары орнатылған 30-дан астам мобильді құрылғыны пайдаланған. Тергеу барысында ноутбук, Ресей байланыс операторларына тиесілі 11 SIM-карта, сондай-ақ шетелдік қаржы ұйымдарының банктік карталары тәркіленді.
Алдын ала есептеулер бойынша, куратор қылмыстық әрекеттен шамамен 10 миллион теңге, ал оның әрбір сыбайласы 3 миллион теңгеден табыс тапқан.
Сондай-ақ тергеу нұсқасына сәйкес, дропперлердің бірі бастапқыда қарапайым орындаушы болғанымен, кейін куратордың сенімді көмекшісіне айналған. Ол тек қаражатты шешумен шектелмей, басқа дропперлердің банк есепшоттары бұғатталған жағдайда оларды қаржы ұйымдарына бірге апарып, көмектесіп отырған.
Қылмыстық схемаға қатысы бар барлық күдікті ұсталып, Алматы облысы полиция департаментіне жеткізілді. Қазіргі уақытта сотқа дейінгі тергеу амалдары жүргізіліп жатыр.
Тәртіп сақшыларының айтуынша, барлық қатысушы мен олардың әрекеттері толық анықталғаннан кейін банктерге алаяқтық фактілерін тіркеу және келтірілген нақты залал сомасын айқындау үшін санкцияланған сұраулар жолданатын болады.
