Оқиға 2025 жылдың 5 желтоқсанында Алматы – Көкпек – Көктал – Шонжы автожолының 80-шақырымында тіркелген.
Алдын ала мәлімет бойынша, Audi A6 жүргізушісі рөлге ие бола алмай, қарсы қозғалыс жолағына шығып кеткен. Сол сәтте ол қарсы бағыттан келген Nissan Cefiro көлігімен бетпе-бет соқтығысқан.
Алматы облысы ПД баспасөз қызметінің хабарлауынша, апат салдарынан екі жүргізуші мен екі жолаушы оқиға орнында көз жұмған. Тағы үш жолаушы түрлі жарақаттармен ауруханаға жеткізілген.
Қазіргі уақытта полиция оқиғаның нақты себептері мен мән-жайын анықтау үшін сотқа дейінгі тергеу жүргізіп жатыр. Тергеу барысы облыстық полиция департаменті басшылығының бақылауында.
