Қазақстан Республикасы ІІМ орынбасары Сәкен Сәрсенов Алматы облысына іссапар барысында полиция бөлімшелерінің жұмысымен танысып, қызметтің тиімділігін арттыруға қатысты бірқатар міндеттер жүктеді.
Сапар аясында министр орынбасары Жедел басқару орталығына барып, бейнебақылау жүйесінің жұмысын тексерді. Ол камералардың тиімділігін бағалап, мониторинг пен жедел әрекет ету алгоритмдерін жетілдіру жөнінде тапсырмалар берді.
Ерекше назар «Екин-Патруль» және «Сергек-Патруль» мобильді кешендеріне аударылды. Сәрсенов патрульдік автокөліктердің техникалық мүмкіндіктерін қарап, жол қауіпсіздігін жақсарту мақсатында интеллектуалды жүйелерді кеңінен қолдану мәселелерін талқылады. Сонымен қатар қауіпті жол учаскелеріне барып, жол-көлік оқиғалары жиі болатын себептермен танысты және тәуекелдерді төмендету бойынша ұсыныстар айтты.
Жұмыс сапары барысында вице-министр аудандық полиция бөлімдеріне де барып, қызметкерлердің жұмыс жағдайын, цифрлық сервистердің енгізілу барысын тексерді. Алматы облысы ПД басшылығы оған құқықтық тәртіпті қамтамасыз етуге арналған заманауи техника мен арнайы құралдарды таныстырды. Олардың қатарында патрульдік қызметке арналған жаңа жабдықтар, мобильді мониторинг кешендері, байланыс құрылғылары және полиция жұмысының жеделдігін арттыруға бағытталған технологиялық шешімдер бар.
Жеке құраммен кездесуде Сәкен Сәрсенов «Заң мен тәртіп» тұжырымдамасының жүзеге асырылуына тоқталып, полицияның ашықтығын қамтамасыз ету, азаматтардың сенімін арттыру және көрсетілетін қызметтердің сапасын көтеру қажеттігін атап өтті. Оның айтуынша, заманауи полицияның тиімділігі тәртіпке, кәсіби даярлыққа және халықпен дұрыс коммуникация орната білуге тікелей байланысты.
Сапар қорытындысында министр орынбасары жедел жұмысты күшейтуге, профилактикалық шараларды арттыруға және қызметтік қызметке заманауи технологияларды кеңінен енгізуге бағытталған нақты тапсырмалар берді.
