Форум орман шаруашылығы саласындағы ең ауқымды халықаралық диалог алаңдарының бірі саналады. Биыл шараға Ресейдің 22 өңірі, сондай-ақ Қытай, Беларусь және Қазақстан делегациялары қатысты. Ағаш дайындау мен терең өңдеу бойынша жетекші аймақтардың бірі Вологда облысы дәстүрге сай форумды ұйымдастырушылар қатарында болды.
Жұмыс сапары аясында қазақстандық делегация Вологда облысы Үкіметінің төрағасы Александр Мордвиновпен кездесті. Тараптар орман өнеркәсібі, агропром кешені, туризм, мәдениет және спорт бағыттарындағы ынтымақтастықты талқылады.
Кездесудің негізгі нәтижесі – Вологда облысы Үкіметі мен Алматы облысы әкімдігі арасындағы Өзара түсіністік туралы меморандумға қол қою. Құжат екі өңірдің ұзақ мерзімді серіктестігінің негізін қалап, бірлескен жол картасын әзірлеуге мүмкіндік береді.
Алматы облысы әкімінің орынбасары форумның халықаралық маңызын ерекше атап өтті.
«Форум жылдар бойы саланың стратегиялық бағытын анықтайтын ең беделді алаңдардың біріне айналды. Мұнда ормандарды қорғау, қалпына келтіру, жаңа технологияларды енгізу, саланы цифрландыру сияқты өзекті мәселелер талқыланады. Бұл тақырыптар Алматы облысы үшін де аса маңызды. Қазақстан Президенті Қасым-Жомарт Тоқаев Мәскеуде: “Ресей мен Қазақстан ынтымақтастығының ауқымы ерекше. Біз байланыспайтын бірде-бір сала жоқ”, – деген еді. Бұл сөздер біздің әріптестіктің мәні мен рухын дәл сипаттайды», – деді Бақытнұр Бақытұлы.
Алматы облысы да орман қоры мол өңірлердің бірі ретінде табиғи ресурстарды тиімді пайдалану мен экологиялық саясатты күшейтуге басымдық беріп келеді.
Экономикалық көрсеткіштер де оң динамиканы көрсетеді:
2025 жылдың 9 айында Алматы облысы мен Ресей арасындағы тауар айналымы 745 млн долларды құрады (2024 жылмен салыстырғанда +29,3%).
Облыста Қазақстан-Ресей капиталы бар 77 кәсіпорын, сондай-ақ 216 ресейлік компания жұмыс істейді.
Қағаз және қағаз өнімдерін өндіру 10 айда 46 млрд теңгеге жетіп, ИФО 125,9% болды.
Негізгі компаниялар: «ИНТЕЛЛСЕРВИС», «KZ Recycling».Жиһаз өндірісінің көлемі – 22,3 млрд теңге (ИФО — 87,8%).
Ірі өндірушілер: «КПК ZETA», «Асар құрылыс» ЖШС.
Бақытнұр Бақытұлы форум ұйымдастырушыларына алғыс білдіріп, шараның екі өңір үшін де маңызын атап өтті.
«Халықаралық сарапшылар қауымдастығын дамытуға қосқан үлесі үшін форумға қатысушыларға ризашылығымды білдіремін. Биылғы форумның нәтижелері екі өңірдің орман шаруашылығы саласын дамытуға серпін беретініне сенімдімін», – деді ол.
Алматы облысының делегациясы форум аясында салалық кездесулер мен саламатты ресурстарды басқаруға бағытталған панельдік талқылауларға қатысуды жалғастыруда.
