Нысан өңірдің «Шығыс қақпасы» инфрақұрылымдық аймағына кіріп, Алматы мен облыстың кеңістіктік дамуындағы маңызды логистикалық хаб болмақ.
Ашылу рәсіміне Алматы облысының әкімі Марат Сұлтанғазиев, ҚР Сауда және интеграция министрлігінің бірінші вице-министрі Айжан Бижанова, сондай-ақ логистика және девелопмент саласының жетекші компаниялары қатысты.
Жобаға салынған инвестиция көлемі – 22 млрд теңге. Бірінші кезеңде «А» санатындағы 50,3 мың шаршы метр заманауи екі қойма корпусы іске қосылды. 12 метр төбе биіктігі, шаршы метріне 8 тонна жүк көтеретін еден және халықаралық өрт қауіпсіздігі талаптарына сай жабдықталған жүйелер қойманы жоғары класты инфрақұрылымға айналдырады. Парк толық қуатында 2026 жылы жұмыс істей бастайды, онда 250 тұрақты жұмыс орны ашылады.
Географиялық орналасуы – Алматы қаласы, ҮАААЖ, халықаралық әуежай және ірі көлік магистральдарына жақын болуы – парктің Орталық Азиядағы ірі дистрибуция орталығына айналуына мүмкіндік береді.
Алматы облысының әкімі Марат Сұлтанғазиев жаңа нысанның елдің транзиттік әлеуетін арттырудағы маңызын атап өтті:
«Бұл логистикалық парк – халықаралық сауда ағындарын тиімді басқаруға, транзиттік әлеуетімізді күшейтуге бағытталған маңызды жоба. “А” санатындағы қоймалардың іске қосылуы – облыс экономикасының тұрақты дамуы мен инвесторлардың жоғары сенімінің айқын дәлелі».
ҚР Сауда және интеграция министрлігінің бірінші вице-министрі Айжан Бижанова:
«Бұл парк Қазақстанның халықаралық көлік дәліздеріне интеграциялануын күшейтеді. Ауқымды инфрақұрылым отандық бизнеске жаңа мүмкіндіктер ашады және еліміздің Еуразиядағы сауда хабы ретіндегі орнын нығайтады», – деді.
Парк директоры Роман Жужлев техникалық көрсеткіштерді таныстырып:
«14 гектарда 50 мың шаршы метрлік ‘А’ санатындағы қойма салынды. 12 метр төбе биіктігі мен 8 тоннаға дейінгі еден жүк көтерімділігі кез келген стеллаж немесе көпдеңгейлі сақтау жүйесін орнатуға мүмкіндік береді», – деді.
Талғар ауданының әкімі Таңат Айдарбеков жоба аудан экономикасына серпін беретінін айтты.
Электронды сауданың қарқынды өсуі қойма инфрақұрылымына деген сұранысты арттырып отыр. 2024 жылы e-commerce үлесі бөлшек сауданың 14,5%-ын құрады – бұл 2021 жылмен салыстырғанда алты есе артық.
Ozon, DNS компанияларының өкілдері де заманауи қойма жүйелерінің онлайн-сауда тиімділігіне тікелей әсер ететінін атап өтті.
Инвесторлар паркті Құлжа бағыты бойынша кеңейтіп, 300 мың шаршы метрге дейін қосымша қойма алаңын салуды жоспарлап отыр. Sudakov Group бас директоры Алексей Судаков функционалды қойма нысандарына сұраныс тұрақты түрде артып келе жатқанын айтты.
Салтанатты шарада NOYTECH және «Еуразиялық логистикалық парк» арасында стратегиялық серіктестік туралы келісім жасалды.
NOYTECH Қазақстан директоры Валерия Кошелева жаңа нысан жоғары технологиялық сервистерді дамытуға жол ашатынын жеткізді.
Жаңа Еуразиялық индустриалды-логистикалық парк – қойма кешені ғана емес, Қазақстанның Еуразиядағы маңызды логистикалық хабына айналуына негіз қалайтын стратегиялық жоба. Нысан халықаралық сауда, транзит және инвестициялық ықпалдастық бағытындағы жаңа мүмкіндіктерді ашады.
