Өңірдің бірнеше ауданы мен қаласында өткен мәслихат сессияларында кәсіпкерлердің салықтық жүктемесін азайту мәселесі қаралып, қолдау тапты. Нәтижесінде Жамбыл, Іле, Қарасай аудандарында және Қонаев қаласында арнайы салық режимі бойынша мөлшерлеме 4 пайыздан 2 пайызға дейін төмендетілді. Ал Еңбекшіқазақ, Талғар және Ұйғыр аудандарында бұл көрсеткіш 4 пайыздан 3 пайызға төмендеді.
«AMANAT» фракциясы бұл мәселені бірнеше ай бойы көтеріп, кәсіпкерлермен тұрақты кездесулер өткізіп, олардың ұсыныстарын жинақтаған. Партия өкілдері шағын және микро бизнеске түсетін салықтық қысымды азайту қажеттігін мәслихаттарға жүйелі түрде жеткізіп, бастаманың жүзеге асуына ықпал етті.
Жаңа мөлшерлемелер 2026 жылғы 1 қаңтардан бастап күшіне енеді. Сарапшылардың айтуынша, салықтың төмендеуі кәсіпкерлердің шығындарын азайтып, айналым қаражатын көбейтуге, бизнесін дамытуға қосымша мүмкіндік береді.
«AMANAT» партиясының өкілдері қабылданған шешім өңірдегі кәсіпкерлікті қолдауға, бизнес үшін қолайлы жағдай қалыптастыруға және экономикалық белсенділікті арттыруға бағытталғанын атап өтті. Партия алдағы уақытта бұл бағыттағы жұмысты басқа өңірлерде де жалғастыруды жоспарлап отыр.
