Төтенше жағдайлар министрлігінің мәліметінше, 18 жастағы үш жігіт 3355 метр биіктікте орналасқан тау жотасында адасып қалған.
Ведомствоның Telegram-арнасында жазылғандай, олар Басута шыңына көтеріліп, әрі қарай «Шымбұлақ» тау-шаңғы кешені бағытымен қозғалған кезде соқпақтан шығып кеткен.
«Соқпақтан жаңылған олар жер бедерінің күрделілігі мен түн мезгілінің қараңғылығына байланысты төмен түсе алмай қалған. Сол себепті өз бетімен бастапқы бағытқа қайта оралу мүмкін болмаған», – деп хабарлады ТЖМ.
Оқиға орнына құтқарушылар дереу аттанып, іздестіру-құтқару жұмыстарын жүргізген. Мамандар жастардың қозғалысын бақылап, қауіпсіз түсуін үйлестірген.
Барлық турист аман-есен төмен түсірілді. Құтқарушылардың айтуынша, оларға медициналық көмек қажет болмаған.
