Полиция департаментінің мәліметінше, өңір аумағында 10 мыңнан астам бейнебақылау камерасы орнатылған. Бақылау жүйелерінің басым бөлігі жол-көлік оқиғалары жиі болатын қауіпті учаскелерге қойылған. Солардың бірі – Үлкен Алматы айналма жолы (УААЖ), қала маңындағы қозғалысы ең қарбалас бағыттардың бірі.
Қазір осы магистраль бойындағы 50-ге жуық камера жасанды интеллект жүйесімен жабдықталды. Жаңартылған технология жол үстіндегі кез келген қауіпті жағдайды автоматты түрде анықтап, орталыққа дереу хабар береді.
Алматы облыстық полиция департаментінің бастығы Мейрам Әбікеевтің айтуынша, заманауи цифрлық бақылау жүйелерін енгізудің басты мақсаты – жолдағы тәртіпті күшейтіп, апат санын азайту.
«325 автоматтандырылған бақылау кешені, 9100 камера орнаттық. Мұның бәрі – жүргізушілер жол ережесін бұзбай, апатқа ұрынбасын деген мақсат. Бірақ технология қанша дамыса да, жүргізушілердің мәдениеті өзгермейінше, нәтиже толық болмайды», – деді ол.
Цифрлық бақылау тек республикалық маңызы бар жолдармен шектелмейді. Соңғы үлгідегі камералар 32 ауылдық елді мекенге орнатылып жатыр. Полиция қызметкерлері күн сайын облыс бойынша 100-ден астам жол ережесін бұзу дерегі тіркелетінін айтады.
Жүргізушілер де бақылау жүйесінің пайдасын атап өтті. Олардың сөзінше, камералар көбейгелі жылдамдықты арттыру фактілері азайған, жолдағы тәртіп жақсарған.
