Алдын ала мәліметке сәйкес, туристер тауға күндіз көтерілген, алайда уақытты дұрыс жоспарламай, қараңғы түскенде өз бетімен қайта түсу мүмкін болмаған. Олар құтқару қызметіне хабарласып, өздерінің Көтұрбұлақ шыңында орналасқанын айтқан.
Төтенше жағдайлар министрлігінің хабарлауынша, оқиға орнына аттанған құтқарушылар Көтұрбұлақ шыңына бағыт алғанымен, туристерді Букреев шыңынан тапқан.
«Құтқарушылардың жедел әрі кәсіби әрекеттерінің арқасында екі адам да аман-есен төмен түсірілді. Оларға медициналық көмек қажет болған жоқ», — деп хабарлады ведомство.
Бұл — соңғы күндері өңірде тіркелген жалғыз жағдай емес. Бұған дейін Алматы тауларында Башұта шыңынан түсу кезінде адасып қалған туристер тобы да құтқарушылардың көмегіне жүгінген. Қараңғыда олардың қара түсті күртешелері оларды табуды қиындатқан.
Құтқарушылар тұрғындарға тауға шығар алдында ауа райын, уақытты және қауіпсіздік талаптарын мұқият ескеруді ескертеді.
