Шара «Туған жерге туыңды тік!» қағидаты аясында ұйымдастырылып, ауданның дамуына үлес қосып жүрген азаматтарды, зиялы қауымды, кәсіпкерлерді, түлектер мен жас буынды біріктіруді мақсат етеді.
Алғашқы күн – білім мен ғылымға арналды
Апталықтың алғашқы күні «Білім мен ғылым күні» ретінде бастау алып, туған өлкесінің өркендеуіне үлес қосып жүрген түлектер, ұстаздар және оқушылар бас қосты.
Форумға ауданнан түлеп ұшқан белгілі тұлғалар – ғалым Марат Қайратұлы мен тәжірибелі педагог, білім саласының ардагері Айман Әлібекқызы арнайы келіп, жас буынға бағыт-бағдар беріп, туған жерге қызмет ету — әр азаматтың борышы екенін баса айтты.
— «Туған жерге қызмет көрсету – адамдық парыз. Ұйғыр ауданының мәртебесін өсіру – біздің ортақ міндетіміз», – деді белгілі академиялық ортада танылған ғалым Марат Қайратұлы.
“Менің мектебіме тарту” акциясы
Күн барысында аудан мектептерінде IT және STEM бағытындағы көрме ұйымдастырылды. Оқушылардың инновациялық жобалары таныстырылып, түлектер мен білім ошақтары арасындағы жаңа серіктестік келісімдері жасалды.
Бұл бастама ауданның келешек дамуында білім мен ғылымның рөлін арттыруға бағытталып отыр.
- Апталықтың келесі күндеріндегі жоспар:
- 2-күн – Әдебиет пен мәдениет күні
Шығармашылық шеберлік сабақтары, «Шарын – шабыт мекені» атты әдеби-музыкалық кеш өтеді. - 3-күн – Спорт және денсаулық күні
Жаппай спорттық жарыстар, салауатты өмір салтын көтермелеу, мектептерге спорт жабдықтарын тарту. - 4-күн – Ауыл шаруашылығы мен кәсіпкерлік күні
Кәсіпкерлер форумы, фермерлер панельдік сессиясы, ауыл инфрақұрылымын дамыту жобаларының таныстырылымы. - 5-күн – «Бірлік пен даму» форумы
Ауданға еңбегі сіңген азаматтар марапатталып, алдағы жылдарға арналған даму қорытындысы мен шешімдер қабылданады.
Тарихқа тағзым – болашаққа бағдар
Ұйғыр ауданының 90 жылдық мерейтойы — өткенді ұлықтап қана қоймай, жаңа биіктерге жол ашатын маңызды кезең. Апталық барысында қабылданатын бастамалар өңірдің экономикалық, әлеуметтік және рухани дамуына серпін береді деп күтілуде.
«Туған жерге туыңды тік!» — бүгінгі ұрпақтың болашаққа жолдайтын аманаты.
