Биыл бұл дақылдың егіс алқабы екі мың гектарға жуық ұлғайып, өндіріс көлемін айтарлықтай арттыруға мүмкіндік бермек.
Ауыл шаруашылығы тауар өндірушілерінің жоспарына сәйкес, ағымдағы маусымда 45 мың тоннаға дейін жүгері жиналады деп күтілуде. Салыстырмалы түрде айтқанда, өткен жылы аудан шаруашылықтары шамамен 30 мың тонна өнім алған болатын. Жиналған өнімнің 20 мың тоннасы шаруашылықтардың өз қажеттіліктеріне қалдырылып, қалған бөлігі Жаркент крахмал зауыты мен «Азия Агрофуд» компаниясына өңдеуге жөнелтіледі.
Ұйғыр ауданы облыстағы жүгері өсіру және өңдеудің негізгі орталықтарының бірі саналады. Биыл мұнда 25 мың гектардан астам ауыл шаруашылығы жері игеріліп, соның 6 мың гектардан астамына жүгері егілген.
Аграршылар заманауи технологияларды да белсенді қолдануда. Атап айтқанда, 3,5 мың гектарда су үнемдеу әдістері енгізілген. Бұл өндіріс тиімділігін арттырып қана қоймай, су ресурстарына түсетін жүктемені де азайтуға мүмкіндік береді. Мемлекет тарапынан қолдау көрсетіліп, тыңайтқыш, дизель отыны мен өнімді өңдеуге арналған субсидиялар бөлінуде.
Мал шаруашылығын дамытуға да басымдық берілуде. Кейбір шаруашылықтар жүгеріні сүрлемге жинап жатыр. Мұндай жем шығындарды азайтып, шаруашылықтардың табыстылығын арттыруға ықпал етеді. Мәселен, биылғы маусымда бір ғана қожалық шамамен 300 тонна сүрлемдік жем дайындауды жоспарлап отыр.
Жалпы, Алматы облысында биыл 50 мың гектардан астам жерге жүгері егілді. Өткен маусымда шаруашылықтар шамамен 270 мың тонна өнім жинаса, биыл аграршылар бұдан да жоғары көрсеткішке қол жеткізуді көздеуде.
