Жобаны жүзеге асыруға 3,5 млрд теңге көлемінде инвестиция тартылған. Бұл қаражат зауытты заманауи құрал-жабдықтармен жабдықтауға, өндірістік аумақты кеңейтуге және еңбек жағдайын жақсартуға бағытталған.
Кәсіпорынның жылдық өндірістік қуаты – 1 500 шаршы метр дайын өнім. Қазіргі таңда зауытта 100 адам тұрақты жұмыспен қамтылған.
Зауыт табиғи тасты кесу, өңдеу және әрлеумен айналысады. Негізгі өнімдері:
табиғи граниттен жасалған қаптау плиталары,
төсеу плиталары.
Бұл өнімдер құрылыс және абаттандыру саласында кеңінен қолданылады. Гранит плиталары қалалық саябақтар, жаяу жүргіншілер жолдары мен тұрғын үйлердің қасбеттерін көріктендіруде жоғары сұранысқа ие.
Өнімнің сапасы шетелдік нарықта да мойындалуда. Бүгінде кәсіпорын өз өнімдерін Ресей Федерациясына, Өзбекстанға, Қырғызстанға және Тәжікстанға экспорттап отыр. Бұл зауыттың халықаралық нарықтағы бәсекеге қабілеттілігін арттыруға мүмкіндік береді.
Зауыттың қызметі Алматы облысының экономикасына оң әсерін тигізіп келеді. Жаңа жұмыс орындарының ашылуы және салық түсімдерінің артуы өңірдің әлеуметтік-экономикалық дамуына серпін беруде.
Зауыт директоры Приходько Антон Владимировичтің айтуынша, алдағы уақытта өндіріс көлемін ұлғайтып, өнім түрлерін көбейту және экспорттық бағытты кеңейту жоспарланып отыр.
«ЗОК Күрті» зауыты – Алматы облысының индустриялық әлеуетін арттырып, өңірлік экономиканың дамуына үлес қосып отырған маңызды өндіріс орны. Болашақта кәсіпорын Қазақстанды табиғи тас өнімдерін өндіруде жетекші мемлекеттердің қатарына қосуға ықпал етуді мақсат етеді.
Бұл зауыттың жетістігі – еліміздегі өнеркәсіптік жаңғырудың нақты көрінісі.
