Салтанатты іс-шараға Алматы облысының әкімі Марат Елеусізұлы Сұлтанғазиев, Қарасай ауданының әкімі Жасұлан Тоққожаұлы Естенов, «Қонаев» әлеуметтік-кәсіпкерлік корпорациясы» АҚ басқарма төрағасы Мұрат Кеңесұлы Әбдіғұлов және мемлекеттік органдардың өкілдері, инвесторлар, серіктестер, бұқаралық ақпарат құралдары мен жергілікті тұрғындар қатысты.
Өңір басшысы өз сөзінде жаңа зауыттың ашылуы тек Алматы облысы үшін ғана емес, бүкіл елдің сүт индустриясы үшін маңызды қадам екенін атап өтті.
«Бүгін біз ауыл шаруашылығы саласында жаңа белеске көтеріліп отырмыз. Сүт өнімдерін терең өңдеу – еліміздің азық-түлік қауіпсіздігін қамтамасыз етуде басты бағыттардың бірі. Бұл зауыттың іске қосылуы ішкі нарықты сапалы өніммен қамтамасыз етіп қана қоймай, экспорттық әлеуетімізді арттыруға да жол ашады. Сонымен қатар жаңа жұмыс орындары ашылып, ауыл тұрғындарының әлеуметтік жағдайы жақсарады», – деді Марат Сұлтанғазиев.
Жаңа кәсіпорын ең озық еуропалық технологиялармен жабдықталған. Зауыттың қазіргі қуаттылығы тәулігіне 50 тонна сүтті терең өңдеуге жетеді. Алдағы жылдары өндіріс көлемін 150 тоннаға дейін арттыру жоспарланып отыр.
Бұл көрсеткіш Қазақстан нарығы үшін үлкен мүмкіндік. Зауыт тек ешкі және бие сүтін өңдеумен шектелмей, болашақта сиыр сүтінен де жоғары сапалы өнім шығаруды көздеп отыр. Өнім ассортиментіне балалар тағамына арналған қоспалар, диеталық өнімдер, құрғақ сүт, ірімшік және халықаралық стандарттарға сай басқа да сүт өнімдері кіреді.
Жобаның жалпы инвестиция көлемі 4,5 миллиард теңге. Бұл қаржы:
заманауи еуропалық құрал-жабдықтарды сатып алу және орнатуға;
инновациялық өндірістік желіні іске қосуға;
өнімнің жоғары сапасы мен қауіпсіздігін қамтамасыз етуге;
зертханалық бақылау жүйесін жетілдіруге бағытталды.
Инвесторлар бұл жобаның экономикалық тиімділігімен қатар, өңірдегі әлеуметтік маңыздылығына да назар аударғанын атап өтті. Зауыт толық қуатында жұмыс істеген кезде жүзден астам жаңа жұмыс орны ашылып, жергілікті тұрғындар тұрақты табыс табуға мүмкіндік алады.
Бұл жобаның ерекшелігі – шикізаттың басым бөлігі жергілікті шаруашылықтардан сатып алынады. Бұл өз кезегінде өңірдегі мал шаруашылығын дамытуға және фермерлік қожалықтардың табысын арттыруға жол ашады.
Алматы облысында ешкі және бие сүтін өндіретін шағын және орта шаруашылықтар көптеп кездеседі. Бұған дейін олардың өнімін терең өңдеу мүмкіндігі шектеулі болған. Енді жаңа зауыттың ашылуымен бұл мәселе шешімін тауып, фермерлер үшін тұрақты өткізу нарығы қалыптасады.
«Бұған дейін біз өндірген шикізатты толық көлемде өткізе алмай, кейде шығынға ұшырайтынбыз. «Neo Milk» зауыты іске қосылғаннан кейін өнімімізге деген сұраныс тұрақты болады деп сенеміз. Бұл біз үшін үлкен қолдау», – дейді жергілікті фермерлік қожалық иесі.
«Neo Milk» зауытының өнімдері тек ішкі нарыққа ғана емес, шетелге де бағытталатын болады. Қазіргі таңда кәсіпорын Қытай, Ресей және Таяу Шығыс елдерімен экспорт жөнінде келіссөздер жүргізуде.
Халықаралық стандарттарға сай өндірілген сүт өнімдері шетелдік нарықта бәсекеге қабілетті болуы үшін зауытта заманауи зертханалық бақылау жүйесі енгізілген. Әрбір өнім партиясы қатаң сапа тексеруінен өтеді.
Жаңа зауыттың іске қосылуы Алматы облысының ғана емес, бүкіл Қазақстанның азық-түлік қауіпсіздігін қамтамасыз етуге бағытталған маңызды қадам. Терең өңделген сүт өнімдері ішкі нарықтағы импортқа тәуелділікті азайтып, отандық өнімдердің үлесін арттыруға мүмкіндік береді.
Сонымен қатар, бұл жоба ауыл тұрғындарының өмір сапасын жақсартуға ықпал етеді. Жаңа жұмыс орындары ашылып, жергілікті бюджетке салық түсімі көбейеді.
«Neo Milk» зауытының іске қосылуы – Алматы облысының агроөнеркәсіптік кешенін дамытудағы маңызды кезеңдердің бірі. Заманауи технологиялармен жабдықталған кәсіпорын ауыл шаруашылығы мен тамақ өнеркәсібін жаңа деңгейге көтеріп, өңір экономикасына серпін бермек.
Бұл жоба Қазақстанның сүт индустриясын дамытып қана қоймай, әлемдік нарықта отандық өнімнің беделін арттыруға септігін тигізеді. Алдағы уақытта «Neo Milk» ұжымы өндіріс көлемін ұлғайтып, экспорттық бағытты күшейту арқылы Қазақстанды сүт өнімдерін терең өңдеу саласында аймақтағы көшбасшы елге айналдыруды мақсат тұтып отыр.
