Сессия жұмысына Алматы облыстық Қазақстан халқы Ассамблеясы хатшылығының меңгерушісі, облыстық ішкі саясат басқармасы басшысының м.а. Әсел Мұратқызы Джалғаспаева төрағалық етті.
Жиында Мемлекет басшысы Қасым-Жомарт Тоқаевтың Қазақстан халқы Ассамблеясының ХХХІV сессиясында берген тапсырмаларының орындалу барысы қаралып, аудан көлемінде бірлік пен келісімді нығайту бағытында жүргізіліп жатқан жұмыстар талқыланды.
Ұйғыр ауданының әкімі, аудандық Қазақстан халқы Ассамблеясының төрағасы Бота Серікқызы Елеусізова Ассамблеяның қоғамдағы рөлі мен стратегиялық маңызына тоқталды. Бұдан бөлек, аудандық Ақсақалдар кеңесінің төрағасы Жәнет Керімқұлов, ҚХА мүшесі Ришат Розахунов, аудандық аналар кеңесінің төрайымы Күлжахан Аликеева және Ұйғыр этномәдени бірлестігінің төрағасы Арлен Османов сөз сөйледі.
Сессия барысында жастар да белсенділік танытты. Аудандық Ассамблея жастарының төрайымы Ақжан Сегізбаева этносаралық келісім мен қоғамдық тұрақтылықты сақтауда жас буынның рөлін айрықша атап өтті.
Жиын соңында сұрақ-жауап алаңы ұйымдастырылып, қатысушылар пікір алмасып, сессия жұмысы қорытындыланды.
