Жиында Мемлекет басшысы Қасым-Жомарт Тоқаевтың 15 тамызда өткен республикалық Тамыз конференциясында берген тапсырмаларына айрықша назар аударылды. Президент педагог мәртебесін көтеру, сапалы білімге тең қолжетімділікті қамтамасыз ету, әділетті әрі қуатты Қазақстан құру ісіндегі мұғалімдердің рөлін күшейту, мектеп қауіпсіздігін арттыру және білім беру жүйесін жаһандық үрдістерге бейімдеу жөнінде нақты міндеттер қойған болатын.
«Педагог мәртебесін арттыру, қала мен ауыл мектебі арасындағы білім сапасын теңестіру, балалардың қауіпсіздігін қамтамасыз ету – біздің басты міндетіміз. Мектеп қабырғасында әділ де адал азамат қалыптасады. Сондықтан ұстаздарға зор сенім артылып отыр», — деген еді Қасым-Жомарт Тоқаев республикалық жиында.
Алматы облысының әкімі Марат Сұлтанғазиев кеңес барысында өңірдегі білім беру саласының жетістіктері мен өзекті мәселелерін атап өтті. Әкімнің айтуынша, биылғы жылдың ең үлкен қуанышты жаңалығы – Еңбекшіқазақ ауданы Толқын орта мектебінің түлегі Санжар Қуандықтың Ұлттық бірыңғай тестілеуде рекордтық 140 балл жинауы.
«Бұл – қарапайым ауыл мектебінде де терең білім алып, үлкен жетістіктерге жетуге болатынының айқын дәлелі. Осындай табыстарды арттыру – біздің басты мақсатымыз», — деді облыс әкімі.
Оқушылардың қауіпсіздігін қамтамасыз етуге биыл облыстық бюджеттен 525,1 млн теңге бөлінген. Оның ішінде 253,1 млн теңге білім беру мекемелерін лицензияланған күзетпен қамтамасыз етуге, 188 млн теңге бейнебақылау жүйесін жаңартуға, ал 84 млн теңге мекемелерді Жедел басқару орталығына қосуға бағытталды.
Марат Сұлтанғазиев ұстаздардың қоғам алдындағы жауапкершілігіне тоқтала келе:
«Білім беру – ең күрделі әрі маңызды сала. Әрбір педагогтың кәсіби құзыреттілігі жоғары болуы тиіс. Себебі мемлекет те, ата-ана да, болашақ та Сіздерге сенім артады», — деді.
Кеңес барысында педагогикалық қауымдастық Мемлекет басшысы айқындаған бес негізгі бағытты жүзеге асыруға дайын екендігін білдірді. Атап айтқанда, мұғалім мәртебесін көтеру, білім сапасын теңестіру, оқушылардың қауіпсіздігін күшейту, әділетті қоғам құру ісіне атсалысу және білім беру жүйесін заманауи үрдістерге бейімдеу жаңа оқу жылындағы басты міндеттер болып белгіленді.
Жиын соңында ұстаздар қауымына жаңа оқу жылында табыс тілектеліп, жас ұрпақты сапалы білім мен тәрбиемен қамту ісінде бірлікпен жұмыс істеу қажеттігі атап өтілді.
