Елордалық билік халықты қоғамдық көлікті пайдалануға шақыруға ниетті. Бұл туралы Астана қаласының әкімі Жеңіс Қасымбек жеткізді, деп хабарлайды alataunews.kz.
«LRT бойынша қойлатын сұрақтар көп. Біз бұл жобаны бір жыл ішінде аяқтау міндетін қойып отырмыз. Бұл елорда жолдарындағы, әсіресе қаланың жаңа бөлігіндегі кептелістерге байланысты жағдайды өзгерту үшін жеткілікті үлкен қолдау болады», — деді ол.
Оның айтуынша, Астанада қоғамдық көлік белсенді дамып келеді. Соңғы 1,5 жылда әкімдік қоғамдық көліктің 50%-ын жаңартты, 700-ге жуық автобус сатып алынды.
«Қазір қалада 1,5 мыңға жуық автобус жұмыс істейді. Алдағы 1,5 жылда автобустардың санын 2000-ға дейін арттырамыз, халықты қоғамдық көлікті пайдалануға барынша ынталандыратын боламыз», — деді ол.
Әкімдіктің болжамы бойынша, Астана ЖІӨ 2024 жылы 6% құрайды. Қала экономикасының негізі — шағын және орта бизнестің үлесі 72%.
«Бұл бізге ұзақ және қысқа мерзімді кезеңге, бюджетке және қаланың даму бағыттарына тұрақты болжам жасауға мүмкіндік береді. Ең маңызды көрсеткіш – инвестиция көлемі. Мысалы, қазіргі уақытта ол 1,4 трлн теңгені құрайды. Жыл соңына дейін 20% — ға жуық өсім күтеміз және 70% — дан астамы жеке инвестициялар, бюджеттен тыс инвестициялар, оның ішінде шетелдік инвестициялардың үлесі шамамен 150 миллиард теңгені құрайды немесе бұл жалпы қаланың негізгі капиталына инвестициялар көлемінің 10%-дан астамын құрайды», — деп атап өтті қала басшысы.
Шағын және орта бизнесті дамыту үшін жергілікті бюджетте, оның ішінде кредиттер бойынша пайыздық мөлшерлемені субсидиялауға қаражат көзделген.
«Біз осы мақсаттарға 33 млрд теңге жұмсаймыз. Кредиттерге кепілдік беруге шамамен 2 млрд теңге. Сонымен қатар, біз қалада жүзеге асырылып жатқан жобаларға мемлекеттік гранттар береміз. Жеңілдетілген несиелеуге қатысты мәселелер бар. Сондай-ақ жергілікті республикалық бюджет есебінен қаржыландыру көлемі осы мақсаттарға көзделген», — деп толықтырды әкім.
