Президенттің Ауыл шаруашылығы қызметкерлерінің бірінші форумында берген тапсырмалары аясында жеке тұлғаларды кірістері мен мүлкін міндетті декларациялаудан босату туралы шешім қабылданды. Бұл туралы премьер-министрдің төрағалығымен өткен Үкімет отырысында белгілі болды, деп хабарлайды alataunews.kz.
Қаржы министрі Мәди Такиевтің айтуынша, жалпыға бірдей декларациялау жүйесіне алғашқы үш кезеңде 4,8 миллион адам енген. Олардың қатарында мемлекеттік қызметшілер, квазимемлекеттік сектор басшылары мен құрылтайшылары, коммерциялық ұйымдардың өкілдері және олардың жұбайлары бар.
Қаржы министрлігі келесі санаттағы шамамен 8 миллион азаматты декларация тапсырудан босатуды ұсынды:
- Жеке құрылымдар қызметкерлері.
- Зейнеткерлер.
- Үй шаруасындағы әйелдер мен студенттер.
- Басқа да тұлғалар.
Бұл босату жеке тұлғалардың 90%-дан астамын қамтиды. Декларациялауды тек келесі жағдайларда сақтау ұсынылады:
- Қазақстаннан тыс активтері бар азаматтар.
- Бір жыл ішінде 20 мың АЕК (шамамен 74 млн теңге) асатын сомаға сатып алу жасаған тұлғалар.
- Дербес салық салынатын табыс алған азаматтар.
Барлық азаматтарға ерікті түрде декларация тапсыру құқығы сақталады.
Премьер-Министр Олжас Бектенов бұл ұсынысты қолдап, Қаржы, Ұлттық экономика және Әділет министрліктеріне үш күн ішінде заңнамалық түзетулер дайындап, Парламентке енгізуді тапсырды.
«2025 жылы барлық санаттағы азаматтардың декларация тапсыруы жоспарланған болатын. Бірақ халықтың алаңдаушылығын ескере отырып, бұл мәселе қайта қаралды. Қазіргі таңда мемлекеттік деректер базасы цифрландырылған және барлық қажетті ақпарат бар. Сондықтан қалған санаттағы азаматтарды декларация тапсырудан босату орынды шешім деп санаймын,» – деді премьер-министр.
Бұл бастама мемлекеттік қызметтерді оңтайландырып, азаматтардың уақытын үнемдеуге және олардың әкімшілік жүктемесін азайтуға бағытталған маңызды қадам болмақ.
